Tað er stutt millum dystirnar, og tað er ymiskt, sum tann veruleikin verður taklaður kring landið.
Serliga í sovornum førum er tað hent at eiga breiðan hóp. Í gjár var størsta broytingin frá sunnudegnum á KÍ liðnum. Mikkjal Thomassen hevði fimm nýggjar spælarar millum teir fyrstu ellivu, tá ið sammett verður við liðið, sum sunnudagin vann 3-0 á heimavølli ímóti EB/Streymi.
Tað er neyvan søtur musikkur í KÍ, at fyrsta málið í ár fór ígjøgnum í Gøtu. Hóast tann veruleikan, so eru bæði Odmar Færø og Heini Vatnsdal á liðnum eftir hetta umfarið. Í miðverju við trimum eru teir saman við Atla Gregersen, sum aftur ímóti KÍ vísti landsliðsstøði sum stýrimaður á liði, har báðir teir sentralu frammanfyri hann tilsaman eru umleið eins gamlir, sum liðformaðurin og stýrimaðurin hjá teimum er.
Jóannes K. Danielsen hjá KÍ telist støðugt millum teir bestu, og í gjárkvøldið skoraði fyrrverandi álopsspælarin sigursmálið, sum kann fara at vísa seg at vera heilt avgerandi, tá ið tað fer at verða talt saman.
Í hinum borðinum er tvímálaskjúttin hjá EB/Streymi. Símun Sólheim var besti maður hjá heimaliðnum í Hólmanum á Eiði, sum ímóti B68 hevði marginalirnar á sínari síðu. Hann skoraði tvey mál, og tá ið hann økti til 2-0, var talan um meistarligt einmansavrik.
Tað er merkisvert, at greipuvinnararnir í HB eru heilt hamskiftir, síðani Heðin Hansen aftur er komin á liðið eftir skaðasteðg. Hann er sjálvskrivaður verjukendur miðvallari, og fleiri liðfelagar hansara – serliga eyðsýndur var Adrian Justinussen – vístu í gjárkvøldið, at teir av álvara eru komnir á lagið aftur, um enn mótstøðan viknaði í seinna hálvleiki, tá ið ÍF saknaði fleiri av stuðulsspælarunum.
Tá ið NSÍ í tveimum teimum fyrstu umførunum tapti á útivølli ímóti HB og KÍ varð spurnartekin sett við, hvussu donsku spælararnir hjá teimum gula fóru at roynast. Seinastu ferðirnar – og ikki minst í gjárkvøldið ímóti B36 – hava teir báðir av álvara víst, hvør dugur er í teimum. Saman við Peturi Knudsen gingu teir undan, tá ið undirmannaða NSÍ vann trivaligan sigur ímóti B36.
Eina góða løtu í fyrra hálvleiki var B36 leikliga omaná. Tá kendist tað bara vera ein spurningur um tíð, áðrenn bólturin fór at liggja í NSÍ málinum. At Tórður Thomsen hevði fleiri heilt góðar bjargingar. Tað vísti seg at eiga stóran lut í, at tað koppaði soleiðis, sum tað gjørdi.
Tí er liðið hjá Miðlahúsinum í 3 – 4 – 3 útgávu hetta eftir 6. umfar:
Tórður Thomsen, NSÍ – Atli Gregersen, Víkingur, Odmar Færø, KÍ, Heini Vatnsdal, KÍ – Jóannes K. Danielsen, KÍ, Heðin Hansen, HB, Jacob Trenskow, NSÍ, Símn Sólheim, EB/Streymur – Mikkel Elbæk Jakobsen, NSÍ, Petur Knudsen, NSÍ, Adrian Justinussen, HB
