Í annaðkvøld klokkan 19.45 spæla Føroyar annan HM-undankappingardystin í hesari undankappingini.
Dysturin verður leiktur móti Montenegro á Gradski stadion leikvøllinum í Nikšić. Leygarkvøldið vann Montenegro 3-1 á Gibraltar á heimavølli, meðan Føroyar taptu 1-2 fyri Kekkia á útivølli.
Tað verður ein gamal kenningur hjá landsliðnum, ið fer at døma dystin millum Montenegro og Føroyar.
Talan er um 37 ára gamla niðurlendska dómaran, Allard Lindhout. Allard Lindhout dømdi EM-undankappingardystin millum Føroyar og Pólland á Tórsvølli 12. oktober í 2023.
Vit hava ikki tey bestu minnini um hann, tí í 48. minutti gav hann Hørði H. Askham reyða kortið.
Allard Lindhout hevur dømt altjóða dystir fast síðani 2020. Hann hevur regluliga dømt dystir í bestu niðurlendsku fótbóltsdeildini síðani 2015, og áðrenn tað dystir í næstbestu niðurlendsku fótbóltsdeildini.
MONTENEGRO - FØROYAR
Dómari: Allard Lindhout NED
Hjálpardómari 1: Rogier Honig NED
Hjálpardómari 2: Johan Balder NED
Fjórði dómari: Sander van der Eijk NED
VAR dómari: Jeroen Manschot NED
VAR hjálpardómari: Richard Martens NED
FIFA dómaraeygleiðari: Viktor Kassai HUN
FIFA dystarumboð: Rudolphe Mannaerts BEL
