Serbiska tennis stjørnan, Novak Djokovic, byrjaði OL kappingina væl. Undan kappingini var tað eitt sindur óvist, um hann fór at luttaka. Nummar eitt á styrkislistanum valdi tó, sum hann altíð ger, at luttaka og harvið kempa um OL steypið.
Djokovic spældi sín fyrsta dyst í gjár. Mótstøðumaðurin var Hugo Dellien, ið er nummar 135 á styrkislistanum. Á pappírinum var hetta tískil ein avgreiðsluspurningur fyri Djokovic, og soleiðis bleiv eisini. Serbin vann 2-0 í settum, og úrslitini vóru 6-2 í ávikavist fyrsta og øðrum setti.
Vegurin fram til semifinaluna tykist yvirkomiligur fyri heimsins besta – og er hetta serliga við tí í huga, at Djokovic hevur verið ósteðgandi í 2021. Tað er longu greitt, at um Djokovic røkkur semifinaluna, so verður mótstøðumaðurin Alexander Zverev. Zverev er nummar fimm á styrkislistanum, og er høgi týskarin ein spælari, ið bjóðar øllum av á hørðum undirlagið (t.e. hardcourt).
Tískil er ikki óhugsandi, at hetta verður fyrsta veruliga avbjóðingin hjá Djokovic til ársins OL.