Spanska løgreglan hevur tikið ein dana, sum er skuldsettur fyri umfatandi rúsevnasmugling í Danmark Í morgin fara nakrir danskir løgreglumenn til Spania eftir Birger de Wett Olsen, sum spanska løgreglan tók í síðstu viku. Donsku myndugleikarnir hava sóknast eftir Birger de Wett Olsen tey seinastu fýra árini, tí hann er skuldsettur fyri at hava smuglað 13 tons av hasji til Danmarkar við einum seglbáti á sumri í 2003.
Høvuðsmaðurin aftan fyri smuglingina, Claus Malmqvist, fekk fyri tveimum árum síðani 16 ára fongsul, og danska løgreglan vil vera við, at Birger de Wett Olsen var hansara høgra hond.
Løgreglan hevur eisini illgruna um, Birger de Wett Olsen var høvuðsmaður aftan fyri eitt annað smuglaramál, sum snúði seg um 4,7 tons av hasji.
