Sum amtborgarstjóri kundi Lars Løkke Rasmussen leiga hýruvogn, um hann skuldi ørindi fyri amtið, men sjónvarpið hjá danska kringvarpinum skjalprógvaði í gjárkvøldið, at Lars Løkke Rasmussen fekk endurrindaðar148.000 krónur fyri hýruvognaleigu krónur uttan at viðmerkja, hvar hann hevði verið, ella um ferðin hevði nakað við arbeiði hansara at gera.
Tveir fyrrverandi limir í amtsráðnum í Frederiksborg, har Lars Løkke Rasmussen var borgarstjóri, siga við DR, at so lagaligar treytir høvdu teir ikki tey árini, teir sótu í ráðnum.
-Tók eg ein hýruvogn, skuldi eg viðmerkja, hví eg hevði leigað hann, sigur Finn Hansen, sum var konservativt umboð í amtsráðnum.
Serfrøðingar, sum DR hevur tosað við, siga, at kann fíggjarmálaráðharrin ikki prógva, at hann leigaði hýruvogn í sambandi við arbeiði sítt, eigur hann at rinda pengarnar aftur.
Danski Fólkaflokkurin hevur biðið ráðharran greiða frá málinum.
