Barbara Holm
Danmark og Grønland draga ikki eina línu í kappingini um rættin til leiðirnar við Norðpólin. Tað stendur at lesa í einari nýggjari bók, sum danski tíðindamaðurin Martin Breum hevur skrivað.
Høvundurin skrivar í bókini, at sum er er tað danskt-grønlendska stríðið grundað á, hvat skal henda, um Danmark vinnur tað diplomatiska striðið um rættin til økið við pólin.
– Men tað er als ikki vist, at teir grønlendsku politikararnir fara at góðtaka, at leiðin við Norðpólin skal hoyra til ríkisfelagsskapin, skrivar Martin Breum. Í sambandi við bókina hevur hann tosað við grønlendska landsstýrisformannin, Kuupik Kleist, sum heldur, at Norðpólurin eigur at fáa somu støðu sum Suðurpólurin, ið er eitt slag av einum friðaðum ongamannalandi.
- Tað hevði verið óført, um vit kundu fingið semju um, at Norðpólurin hoyrir til mannaættina, og at hann verður friðaður fyri ymiskt virksemi so sum hernaðarligt virksemi, sigur Kuupik Kleist í bókini. Sambært Martin Breum hevur danska stjórnin eina heilt aðra áskoðan, tí hennara mál er at gera Norðpólin danskan, skrivar hann.
Men sambært kanadiska Arktis-serfrøðinginum Michael Byers fer hvørki Danmark, Kanada ella Russland at vinna stríðið um Norðpólin.
- Einki land kann eiga sjógvin og havísin. Stríðið hjá dønum, kanadamonnum og russum um Norðpólin snýr seg meiri um tjóðskaparligan stoltleika og innanríkispolitikk, sigur hann í bókini hjá Martin Breum, sum eitur "Når Isen Forsvinder"
