Tann 97 ára gamli Laszlo Csatary úr Ungarn, sum er undir illgruna fyri krígsbrotsverk undir seinna heimsbardaga, gav ikki boð um at senda umleið 300 jødar til nazistisku leguna í Kamianets-Podiskyi í Ukraina í 1941.
Tað kunngjørdi tann almenni ákærin í Ungarn í dag. Hann hevur kannað málið, síðani Csatary varð handtikin og settur í húsavarðhald miðskeiðis í síðsta mánað.
Tað var Simon Wiesenthal-stovnurin, sum legði Laszlo Csatary undir at hava givið boð um at flyta jødarnar í týningarlegu, men ákærin í Budapest sigur, at Csatary kann ikki hava givið boðini, tí hann var ikki har tá. Harafturat hevði hann ikki nóg høgt starv í løgregluni til at geva slík boð, sigur ákærin.
