Brasilski framherjin hjá ÍF, Clayton Soares, hevur fingið arbeiðis- og uppihaldsloyvini upp á pláss. Sostatt kann framherjin spæla við móti EB/Streymi leygardagin.
Tað kemur væl við fyri ÍF, sum í løtuni er uttan Adeshina Lawal, sum fekk reytt kort í 1. umfari móti Víkingi. Hann fekk leikbann í tveir dystir. Hann sat yvir í javnleikinum móti HB, og skal aftur sita yvir móti EB/Streymi.
Somuleiðis verður Karl Løkin við. Hann hevur skift aftur til føroyskan fótbólt, eftir at hann valdi at gevast í Næstved, har hann ikki slapp á liðið. Her eru øll loyvi eisini komin upp á pláss.
Dysturin millum EB/Streym og ÍF verður leygardagin klokkan 16.
