Í døgunum 2. og 3. februar verður ein heldur annarleiðis stevna hildin í Sjónleikarahúsinum í Havn. Stevnan hevur fingið heitið Vítt til veggja.
Á stevnuni luttaka fólk, sum hava fingið sær útbúgvingar innan alternativar viðgerðarhættir. Sum heitið eisini vísir á, so er vítt til veggja. Flestu luttakarar á stevnuni eru føroyingar, sum hava valt at fylgja sínum dreymi og eini sannføring um, at tað ikki einans eru kemisk evni, ið kunnu lekja sjúkur.
- Størsta forðingin byrjar í egnum hugaheimi. Tankarnir kunnu avgera og hava stóra ávirkan á, hvussu vit menniskju hava tað, bæði kropsliga og sálarliga. Jalig menniskju hava tað altíð betri, enn tey, ið hugsa og eru neiliga sinnaði. Tað krevst ongin vísindalig kanning til at prógva tað, siga fyrireikararnir
Á stevnuni ber til at vitja básar hjá viðgerðarfólki, ið leggja stóran dent á at greiða fólki frá júst innan teirra øki. Nevnast kann millum annað
reiki-healing, akupunktur, clairvoyansa, zonuterapi, healingsmassaga, hypnoterapi og psykoterapi .
Eisini verða fleiri fyrilestrar á skránni báðar dagarnar.
