– Christian Høgni hevur fingið frí og meira liggur ikki í tí, sigur Pauli Poulsen, venjari hjá NSÍ, úr telefonini úr Svøríki.
NSÍ tapti fyrra dystin ímóti Gefle 2-0 í Gundadali, men tað var minni munurin á liðnum.
– Fyri eitt lið, sum spælir í bestu svenskudeildini, so spæla teir ikki góðan fótbólt. Teir hava einar fimm leikarar, sum eru hægri enn 1.90cm, so teir eru betri enn vit í luftspælinum, sigur Pauli Poulsen.
Tað verður torført hjá NSÍ at spæla seg víðir næsta umfar. Tað ásannar Pauli Poulsen eisini.
– Tað verður torført hjá okkum at koma víðari, tí vit skulu í minsta lagi hava tvey mál, meðan teir einki skulu fáa. Vit hava valt at siga tað soleiðis, at vit fara inn fyri at fáa eitt gott úrslit burtur úr hesum dystinum og ikki hugsa um samlaðu uppgerðina, sigur Pauli Poulsen.
– Vit skulu verða skjótari at umstilla okkum, tá vit missa bóltin. Tað gekk gali í Gunadali í fyrra dystinum og teir høvdu ein skjótan framherja sum revsaði okkum. Men vit fara at spæla okkara, eisini í Svøríki. Tað merkir at vit til tíðir missa bóltin í uppspælinum, men soleiðis hava vit valt at spæla fótbólt, sigur Pauli Poulsen at enda.
Dysturin verður hóskvøldið klokkan 18.00 føroyska tíð.
