Í kvøld hava Chelsea og Liverpool spælt seinnu hálvfinaluna í ensku steypakappingini Capital One Cup.
Fyrra hálvfinalan varð leikt á Anfield fyri einari viku síðani, sum endaði við 1-1 javnleiki.
Eisini í kvøld, endaði vanliga leiktíðin við javnleiki. Úrslitið eftir 90 minuttir var 0-0, og sostatt noyddist dysturin út í longda leiktíð.
Tað tók tó ikki langa tíð fyri Chelsea, at avgera dystin í longdu leiktíðini. Einans fýra minuttir inni í longdu leiktíðini fall avgerðin, tá Chelsea verjuleikarin, Branislav Ivanovic skallaði bóltin í netið til endaliga úrslitið, 1-0.
Chelsea er sostatt klárt til finaluna í Capital One Cup.
Hvørjum Chelsea skal møta í finaluni verður avgjørt í annaðkvøld, tá hin hálvfinalan er á skránni. Tá skal Sheffield United á heimavølli taka ímóti Tottenham.
Tottenham vann fyrru hálvfinaluna 1-0.
Dysturin í annaðkvøld byrjar klokkan 19:45 og kann síggjast á 6’aranum.
Chelsea – Liverpool 1-0 (Eftir longda leiktíð. Vanliga leiktíðin endaði 0-0)
1-0 Branislav Ivanovic, 94.
