Í KREPPUÁRUNUM, tá einki skip varð smíðað, gluppu kanska fleiri árgangir av skipasmiðjum okkum av hondum. Nú eru so aftur nøkur smærri skip smíðað ? ferja og løgreglubátar ? og tað kann gerast stórt afturstig, um stígur aftur kemur í føroyskt skipasmíð.
HER skal ikki komast inn á búskaparligu spurningarnar. Men í stuttum skal vísast á, at allur skattur og meirvirðisgjald fellur til føroyska samfelagið. Harafturat kemur so umsetningurin í hjálpar- og hjávinnum. Allir hesir »ringvirkningar« ávirka føroyska samfelagið positiva vegin. Í minsta lagi 20 milliónir. Og harafturat læra skipasmiðir okkara nakað nýtt. Vanliga verður sagt, at besta íløgan í einum samfelagi, er íløgan í útbúgving. Hetta má eisini galda handverk og ikki bara hægri ella miðnámsútbúgvingar.
HARAFTURAT kemur tann kensluligi spurningurin. Tað hevur sanniliga týdning, at nýggja vaktar- og bjargingarskipið er smíðað í Føroyum. Her skal ikki verða sagt, at tað skal gjaldast fyri stoltleika í øllum viðurskiftum, men tað hevur ein moralskan og eggjandi týdning at kunna vísa, at hetta eru føroyskir handverkarar og føroyskar skipasmiðjur førar fyri at avrika. Eitt slíkt avrik kann gerast góð reklama fyri føroyskt skipasmíð. Og allir tilvitandi føroyingar eru greiðir yvir, at neyðugt er at menna føroyska vinnu, føroyska búskapin, nú fullveldið stendur fyri framman!!!
