-Tað er púra burturvið av grønlendska landsstýrinum at boykotta fundin í Arktiska Ráðnum.
Tað sigur fyrrverandi landsstýrisformaðurin Kuupik Kleist við grønlendska kringvarpið. Hann vísir á, at ósemjan um umboðanina í ráðnum er næstan líka gomul sum ráðið sjálvt, men at tað loysir ikki trupulleikan, at Grønland boykottar fundin.
-Eg skilji ikki, at landsstýrið hevur tikið hasa avgerðina. Tað er bara annaðhvørt ár, at Arktiska Ráðið heldur ráðharrafund, og mínar royndir eru, at tað ber væl til at skifta orð við allar ráðharrarnar. Tað er ikki á hvørjum degi, at ein fær orð á Kerry og Lavrov undir fýra eygum, men tað letur seg væl gera á ráðharrafundinum hjá Arktiska Ráðnum, sigur Kuupik Kleist við KNR.
Hann er samdur við landsstýrinum um, at sviar hava ikki handfarið fundin serliga væl, men vísir á, at tað eru ikki bara Danmark og Grønland, sum hava hendan trupulleikan. Tað sama er við samunum í Svøríki og Finnlandi og við ymsum landspørtum í Kanada, sigur hann.
Danski uttanríkisráðharrin, Villy Søvndal, sum er á fundinum í Svøríki, segði í morgun, at hann harmaðist avgerðina hjá Grønlandi.
