Tvær bumbuspreingingar í russiska lýðveldinum Dagestan í kvøld hava kravt minst 12 mannalív, og meiri enn 20 fólk eru særd. Russiska tíðindastovan Interfax skrivar, at bumburnar brustu uttan fyri eina løgreglustøð, og at seks av teimum, sum doyðu, vóru løgreglumenn. Hini seks vóru tríggir russiskir embætismenn og trý sivilfólk.
Bumburnar brustu við stuttum millumbili í býnum Makhatjkala, sum er høvuðsbýur í Dagestan. Interfax skrivar, at bumburnar vóru so mikið sterkar, at fleiri bygningar fingu skaða.
Russisku myndugleikarnir hava leingi ligið í stríði við vápnaðar muslimskar bólkar í Dagestan og grannalýðveldunum Ingosjetia og Kekenia. Uppreistrarbólkarnir stríðast fyri sjálvræði og fyri at fáa teir russisku hermenninar burtur úr umráðnum.
