Hósdagurin var góður hjá HB. Meðan argastu kappingarneytarnir í toppinum – NSÍ og B36 – spældu javnt, so vann HB 3-1 á heimavølli ímóti KÍ.
-Nú eru vit væl við, og spælið verður alt betri. Serliga í 1. hálvleiki ímóti KÍ var tað gott, so vit eru væl nøgdir. Liðið er gott, og alt riggar, staðfesti væl nøgdi Heðin Askham.
Í dag fara Heðin Askham og hansara menn út á Argir. Heimaliðið er illa spert, tí higartil hevur tað ikki eydnast AB at vinna fulla úrtøku. Eftir fyrsta umfar sá tað annars ljóst út hjá AB. Tá eydnaðist tað at røkka 2-2 í Gundadali ímóti HB. AB javnaði, tá ið tað restaðu níggju minuttir, og tað var um reppið, at argjamenn tá struku avstað við øllum stigunum.
Hósdagin tapti AB 3-1 á útivølli ímóti Víkingi, sum var greitt omaná:
-Vit vóru ógvuliga vónbrotnir. Nú mugu vit reisa okkum ímóti HB. At vit ikki hava vunnið higartil ávirkar sjálvsálitið, og tað er neyðugt at vit vinna størri úrtøku úr møguleikunum. Okkum tørvar ein sigur fyri at vinna sjálvsálitið aftur, og vónandi verður tað í dag, sigur AB málverjin Heðin Stenberg.
Royndirnar siga HB, at hóast talan er um illa spert mótstøðulið, so skal einki takast fyri givið, tá ið talan er um grannauppgerðir. Setningurin hjá teimum svørtu og reyðu er at syrgja fyri, at vinna fulla úrtøku og harvið at byrgja fyri, at brølarin í fyrsta umfari ikki verður endurtikin seinnapartin í dag.
