George Eustice, ráðharri í fiskivinnumálum (Minister of State at the Department for Environment, Food and Rural Affairs), er á almennari verkavitjan í Føroyum mikudagin og hósdagin. Tað er Høgni Hoydal, fiskimálaráðharri, sum er vertur fyri vitjanini.
Beint eftir, at hann er lendur mikudagin á middegi, verður farið við tyrlu til Klaksvíkar, har miðmáli og fundur verður á Kósini við høvuðsleikararnar í føroysku fiskivinnuni. Eftir hetta gongur leiðin til Fuglafjarðar, har fylgið vitjar umborð á einum uppsjóvarskipi.
Síðan gongur leiðin til Glyvrar, har hann fer at vitja Bakkafrost. Um kvøldið verður døgurði í Runavík, áðrenn leiðin gongur til Havnar við Brimli.
Hósmorgunin fer bretski ráðharrin fyrst á kurteisisfund við Aksel V. Johannesen, løgmann, og síðan á fund við Poul Michelsen, uttanríkis- og vinnumálaráðharra.
Sum tað síðsta á vitjanini fer hann á fund við Høgna Hoydal, fiskimálaráðharra, og eftir tann fundin verður høvi hjá fjølmiðlunum at hitta teir báðar í Tinganesi hósdagin klokkan 11:35-11:50 har greitt verður frá teimum málum, sum vóru umrødd undir vitjanini.
Bretland er í ferð við at taka seg úr ES og fer tí framyvir at krevja sín rætt sum sjálvstøðugt strandaland í fiskivinnusamráðingum um tilfeingi í norðuratlantshavi. Tískil hava slíkar vitjanir sum hendan stóran týdning fyri viðurskiftini millum londini bæði og komandi fiskivinnusamráðingar.
