Brandur og Ajax vunnu týðandi sigur

Tað eru spennandi dagar hjá Brandi Halgirssyni og liðfeløgunum í Ajax Keypmannahavn í næstbestu donsku hondbóltsdeildini. 

Ajax er í kapprenning við Midtjylland og liðið hjá Róa Berg Hansen, HØJ um at røkka triðja plássinum sum gevur rætt til upp- og niðurflytingardystir móti einum liði úr bestu hondbóltsdeildini.

Brandur Halgirsson skoraði tvey mál tá Ajax á heimavølli vann 31-26 á Odense. Í steðginum var Ajax á odda 18-14.

Ajax hevur 35 stig á triðja plássi, og teir hava ein dyst eftir at leika móti Otterup á útivølli 17. apríl.

Midtjylland er á fjórða plássi við 32 stigum, men teir hava tveir dystir eftir at leika. Sunnudagin spæla teir á útivølli móti liðnum hjá Róki Akralíð, HEI Skæring. 

HØJ er á fimta plássi við 31 stigum. Í morgin leika Rói Berg Hansen og liðfelagarnir í HØJ á útivølli móti Team Sydhavsøerne.

Føroyingaliðið SUS Nyborg tapti aftur í kvøld. Hesaferð 26-32 móti Otterup á heimavølli. Í steðginum var Otterup á odda 18-13. Pætur Mikkjalsson skoraði trý mál og Tróndur Mikkelsen skoraði tvey mál fyri SUS Nyborg.

SUS Nyborg fer at enda væl aftast, men tað fær ongar avleiðingar tí bara kappingarnar í tveimum teimum ovastu deildunum eru í gongd orsaka av Korona-ávum. Tískil verður eingin niðurflyting úr næstbestu deildini hesaferð. 

Støðan: