Tann nýskipaða stjórnin í Bosnia-Hercegovina hevur sett sær fyri at fremja neyðugar nýskipanir, so landið kann søkja um limaskap í Evropasamveldinum. Gongst sum ætlað, ætlar stjórnin at senda ta formligu umsóknina til Bruxelles longu í summar, sigur forsætisráðharrin, Vjekoslav Bevanda, við Reuters tíðindastovuna.
-Eg rokni við, at vit fara at lúka umsóknartreytirnar tann 30. juni, sigur Bevanda. Sambært forsætisráðharranum er tað bara neyðugt at broyta ta greinina í landsins grundlóg, sum snýr seg um mannarættindi, soleiðis at reglurnar á tí økinum eru í samsvari við reglurnar hjá ES.
Bosnia-Hercegovina lá í stjórnarloysi í meiri enn eitt ár, men stutt fyri ársskiftið eydnaðist tað at skipa eina samgongustjórn, sum er mannað við muslimskum, serbiskum og kroatiskum politikarum.
