Fólk í Grønlandi, sum eru 65 ár og eldri og sum fingu seinnu koppseting fyri 1. mai í ár við Pfizer/ Biontech, fáa nú møguleikan at fáa eina sonevnda booster-koppseting aftrat.
Grønlendska landsstýrið hevur eftir tilráðing frá landslæknaembætinum gjørt av at fylgja tilmælunum hjá ES-nevndini og bjóðar nú eina eyka koppseting til fólk, sum eru 65 ár og eldri.
Tilboðið vendir sær eisini til fólk, sum eru í serligum vanda fyri at gerast álvarsliga sjúk av koronu, starvsfólk í heilsuverkinum og starvsfólk í eldrarøktini.
Skipað verður fyri koppseting á øllum ellisheimum í Grønlandi. Koppseting av øðrum fólkum verður á sjúkrahúsunum, heilsumiðstøðum og í bygdunum.
Á grønlendsku koronu-heimasíðuni - corona.nun.gl - fer at verða sagt frá, hvussu triðja koppsetingin verður skipað.
- Tey fyrstu, sum fáa tilboð um triðju koppseting, eru borgarar í grønlendska býnum, Sisimiut, og her er talan um borgarar, sum fingu seinna prikið fyri í minsta lagi seks mánaðum síðan.
Longu í morgin kunnu borgarar í Sisimiut, sum eru 65 ár og eldri, fara í bygdarhúsið og fáa triðju koppsetingina. I Ilulissat verður møguleiki at fáa triðju koppseting 24. og 31. oktober.
Í øðrum býum kunnu fólk fáa sína triðju koppseting í bygdahúsum og á ellisheimim.
- Flestu koppsetingarnar fara fram á ellisheimum, og aðrar fara fram á sjúkrahúsum, heilsumiðstøðum og kring um í bygdunum.
Á heimasíðuni hjá grønlendska landslæknaembætinum verður sagt, at heilsuverkið eisini bjóðar vanliga koppseting móti krímsjúku.
- Tørvurin á koppseting móti krímsjúku er eisini stórur, tá koronu-avmarkingar í fjør eisini avmarkaðu útbreiðsluna av krímsjúku. Tíski er væntandi, at mótstøðuevnini hjá fólki móti krímsjúku eru viknað, skrivar Sermitsiaq.
