Fyrsta mars er altjóða Down’s Syndrom dagur, og í tí sambandi varpaði føroyski Down Syndrom bólkinurin ljós á Down’s Syndrom.
Sambært tíðindaskrivi frá Javna, var Down’s Syndrom dagurin á fyrsta sinnið hildin fyri 10 árum síðani, og í 2012 varð dagurin altjóða viðurkendur av ST.
Í Føroyum verður dagurin hátíðarhildin á triðja sinni, og millum annað varð skipað fyri kunnandi tiltakið í Perluni í dag. Afturat tiltøkum er vanligt í útheiminum at lata seg í litfagrar, óparaðar hosur til tess at hátíðarhalda dagin saman við teimum við Down’s Syndromi.
- Men av tí at verðið í Føroyum sjáldan tilletur, at føroyingar vísa hosur herheima hesa ársins tíð, so nýta vit blátt neglalakk í staðin fyri - ella afturat - óparaðu hosunum. Við bláa neglalakkinum vilja vit undirstrika, at fólk við Down's Syndromi, eins og øll onnur, eiga rætt til lívið, sigur føroyski Down’s Syndrom bólkurin í tíðindaskrivi.
Sambært Javna, verður mett, at áleið sjey milliónir fólk í heiminum hava Down's Syndrom. Eingi tøl eru fyri hvussu nógv eru í Føroyum, men sum ein tummilsregla verður eitt barn føtt um árið.
Sjálvt Down's Syndromi stendst av einum eyka kromosomi - oftast kromosomi nummar 21 - ið børnini verða fødd við.
- Ein veit ikki hví hetta kemur fyri. Við rætta stuðli kunnu fólk við Down Syndromi hava eitt vanligt gerandislív eins og øll onnur, sigur Down’s Syndrom bólkurin.
