Rektarin á Fróðskaparsetrinum gleðist yvir politiska áhugan fyri gransking og hægri undirvísing, sum hann mælir til at fara í gongd við beinanvegin At politikarar bæði úr samgongu og andstøðu hava víst stóran áhuga fyri bæði gransking og hægri undirvísing, frøðir rektaran á Fróðskaparsetri Føroya, Jóan Paula Joensen. Hann sigur seg taka undir við øllum tí, sum stendur í samgonguskjalinum um gransking og hægri undirvísing.
- Tað, sum hevur verið eitt av eyðkenninum fyri politiska valstríðið upp til valið 19. januar 2008, er at tað tykist sum um, at okkara politikarar uttan mun til, um teir eru komnir í samgongu ella ikki, hava víst ein stóran áhuga fyri bæði gransking og hægri undirvísing. Eisini stjórin fyri Vinnuhúsinum hevur verið sera positiv, tá tað talan er um at menna føroyska gransking. Sum rektari á setrinum loyvi eg mær tí at hava betri vónir um gransking og hægri undirvísing enn eg nakrantíð havi havt fyrr, skrivar Jóan Pauli Joensen í eini viðmerking, sum kemur í Sosialin mánadagin.
Víðari skrivar hann:
- Samanumtikið er tað tíverri so, at alt sum hevur havt við gransking og hægri útbúgving at gera, hevur verið undirprioriterað fyri ikki at siga beinleiðis forsømt. Hevði føroyska politiska skipanin havt somu prioriteringar og veitt Fróðskaparsetrinum somu sømdir, sum tey javngomlu universitetini í londunum rundan um okkum hava fingið, høvdu vit verið komin nógv longri á leiðina í dag og tað hevði eisini merkt Føroyar fíggjarliga, soleiðis at funnið hevði verið fram til aðrar vinnumøguleikar, skrivar Jóan Pauli Joensen.
Týsdagin verður sokallaður kveikingarfundur fyri politikarar.
