Jan Müller
Tað eru 10 ár síðani fyrstu leitiloyvini vórðu latin í Føroyum. Nú farið verður inn í eitt nýtt 10 ára skeið kunnu vit staðfesta, at tað verður nógv oljuvirksemi á Føroyaøkinum komandi tvey árini. Statoil skal bora ikki færri enn tveir brunnar. Hetta er ein íløga fyri væl yvir eina milliard krónur, og sostatt nógv tann stórsta verkætlanin í Føroyum. Til sammetingar kann sigast, at samlaðu almennu íløgurnar á fíggjarlógini fyri 2011 eru umleið 200 milliónur krónur.
Rúni M. Hansen, stjóri á Statoil, sigur, at enn er ikki endaliga avgjørt, um brunnarnir verða boraðir í 2011 ella 2012.
– Vit hava enn ikki avgjørt, um vit bora í 2011 ella í 2012. Fyrireikingarnar eru fult í gongd. Um vit ikki bora tann eina brunnin í 2011, so verða allarhelst tveir boraðir í 2012. Endalig avgerð verður tikin um ikki so langa tíð.
Spurdur, hvussu tað gongur við fyrireikingunum, sigur hann:
– Tað eru nógv viðurskifti, ið skulu fást upp á pláss, men tað hevur higartil gingið væl. Fleiri av lyklapersónunum kenna væl viðurskiftini um okkara leiðir, og tað er ein stórur fyrimunur.
Statoil hevur 100% ognarskap í fleiri av loyvunum á Føroyaøkinum. Væntast kann, at Statoil selur ein part av hesum, áðrenn borað verður. Spurdur, um samráðingar eru við áhugaðar keyparar, sigur Rúni M. Hansen:
– Tað er ein partur av fyrireikingunum, og eg kann bara stutt siga, at hesin parturin eisini gongur sum ætlað. Hann vil tó ikki siga meira um hetta í núverandi støðu.
Spennandi verður tó at síggja, hvørji nýggj altjóða feløg koma inn á Føroyaøkið, og nær fyrsti brunnurin verður boraður. Hetta fáa vit óiva at vita nakað skjótt í komandi ári.
