Bjarni Djurholm hevur sjávlur tikið undir við at útseta Marknagilsdepilin til 2016, so eg skilji hann als ikki.
Tað sigur Bjørn Kalsø, landsstýrismaður í mentamálum eftir at Bjarni Djurholm, formaður í Mentanarnevndini hjá Løgtinginum saman við meiriluta í nevndini boðar frá, at hann als ikki tekur undir við, at skúladepilin í Marknagili ikki skal gerast liðugur fyrr enn í 2016.
Bjørn Kalsø vísir til eina atkvøðugreiðslu í tinginum í fjør vár, tá uppskotið til samtyktar um játtanarkarmar á løgtingsfíggjarlógini fyri 2012 vórðu avgreiddir.
Tá atkvøddi Bjarni Djurholm og Fólkaflokkurin fyri at útseta hetta skúlan til at verða lidnan í 2016 eftir uppskotið frá minnilutanum í fíggjarnevndini, Jørgen Niclasen og Bill Justinusen, vísir Bjørn Kals á.
Landsstýrismaðurin sigur, at játtanirnar ár fyri ár sambært uppskotinum hjá teimum var lægri, enn tað er í uppskotinum, sum Bjørn Kalsø nú arbeiðir við.
Tí heldur hann, at Bjarni Djurholm mótsigur sær sjálvum, tá hann sigur, at hann ikki tekur undir við at útseta ætlanini til 2016.
Hatta er jú hansara egna uppskot, sigur Bjørn Kalsø.
