Hvar og hvussu heldur Bjørn Patursson, fyristøðumaður í Koltri, nýggjár?
- Eg haldi, sum vant nýggjár her í Koltri. Vit hava á hvørjum ári vitjan av familju og vinum um jólini og á nýggjárinum. Men, í ár vóru vit bæði fyri fyrstu ferð einsamøll um jólini. Vit halda nýggjárið á friðarligan hátt, eitt nú við at ganga túrar í náttúruni, hugna okkum við góðum mati og drekka afturvið.
Bjørn Patursson sigur, at eins og onnur, plaga tey í Koltri eisini at brenna bál og seta livandi ljós í vindeyguni kring um í húsunum á nýggjárinum.
- Tað hendir, at onkur rakett verður skotin, men fyri tað mesta njóta vit bara friðarliga dámin um kring midnátt og inn í nýggja árið, tá vit ynskja hvør øðrum gleðiligt nýggjár.
Keypir tú fýrverk, og dámar tær at skjóta fýrverk?
- Nei, helst ikki, og í ár havi eg einki keypt. Nú, eg eri blivin eldri og klókari, dugi eg ikki at síggja nakað sum helst skilagott í at skjóta fýrverk. Harnæst er tað av trygdarávum sera trupult at transportera fýrverk við tyrluni, sigur Bjørn Patursson.
Hvat var besta upplivingin - størsta hendingin - hjá tær í 2017?
- Størsta hendingin fyri meg í 2017 var, at eg gjørdist sjúkur av strongd, og størsta hendingin var eisini, at eg kom skjótt fyri meg aftur. Í dag kann eg gleðast um, at eg eri frískur sum fuglurin.
Og hvat var tað keðiligasta í 2017?
- Tað keðiligasta, sum hendi mær í 2017, var, sum nevnt, at eg gjørdist sjúkur av strongd. Tað ynski eg ikki fyri nakran at uppliva, sigur Bjørn Patursson.
Hevur tú sett tær fyri at gera nakað serstakt í 2018?
- Eg gleðist nú um, at eg eri frískur. Havi sett mær fyri at merkja eftir, hvussu eg havi tað og at geva heilsuni betri ans. Fari at royna at seta sjóneykuna á tað positiva í lívinum og fegnast um, at heilsan er góð.
Og seinastu orðini úr Koltri í dag - nýggjársaftan - eru hesi: Gleðiligt nýggjár, øll somul!
