Næsta ár verður bíligari at vera sandingur.
Tað er greitt nú kommunustýrið á Sandi hevur samtykt fíggjarætlanina fyri næsta ár.
Fíggjarætlanin varð samtykt í gjár, og í tí sambandi varð samtykt at lækka kommunuskattin eitt hálvt prosent, úr 23,5 prosentm, niður í 23 prosent.
Samstundis er barnafrádrátturin framvegis 6.000 krónur fyri barnið.
Brandur Sandoy, borgarstjóri, sigur í fráboðan í morgun, at hesi næstu árini ætlar kommunan at fyrireika seg til Sandoyartunnilin og tískil verður meiri orka brúkt til at skapa trivnað á Sandi, og at gera bygdina meiri sjónliga í búsetinga- og ferðavinnuhøpi, sum hann málber seg.
Í fíggjarætlanini er lagt upp fyri, at foreldur skulu gjalda barnagarðsgjald í 11 mánaðir, og at foreldur skulu ongantíð gjalda ansing fyri fleiri enn tvey børn.
Somuleiðis er samtykt at gera íløgur fyri knappar tvær milliónir krónur.
- Íløgurnar verða brúktar til at umvæla kommunalar bygningar, laga kirkjugarð, fríðka í bygdini, asfaltera og fyrireika kommunala útstykking, sigur hann.
Borgarstjórin sigur, at fíggjarætlanin er vaksin munandi samanborið við undanfarin ár, tí nú er eldraøkið eisini ein partur av kommunala rakstrinum og tilsamans er raksturin nú góðar 16 millónir krónur.
Bygdaráðið hevur eisini samtykt at gjalda 1,1 millión krónur í avdráttum næsta ár.
Tá ið næsta ár fer at halla, hevur kommunan sostatt, hesi seks seinastu árini, goldið 10 milliónir krónur í avdráttum av lánum, langtíðarskuld, umframt 5,5 milliónir kr av leysaskuld í samband við skúlabygging og skúlarakstur.
Annars eru sandingar bjartskygdir.
- Vinnuliga er Sandoyggin í eini spennandi tíð, nú fiskavirking verður aftur í oynni, umframt at alivinnan er um at fóta sær í oynni, sigur borgarstjórin.
