Tað er ikki so sjáldan, at tað hendir - at frástøðan millum bilarnar í ferðsluni er ov tepur, og tá illa vil til, er skjótt, at eitt ferðsluóhapp stendst av hesum.
Soleiðis var á Glyvrum seinnapartin í gjár.
- Hendingin fór fram, tá ein bilur steðgaði fyri fótgangara og bilurin, sum koyrdi aftan fyri, ikki kláraði at bremsa, men koyrdi á bilin, sum bremsaði fyri fótgangaranum.
Vaktleiðarin visti í morgun at siga, at tá slíkar hendingar fara fram, verður talan um eitt mál, tí bilurin, sum koyrdi aftan fyri, ikki helt neyðugu frástøðuna og kundi steðga.
Tað er munur á einum slíkum máli og einum máli, har onkur kanska missir eina bilhurð á annan bil. Tá plagar løgreglan at lata bileigararnar finna út av tingunum, um tað ber til.
- Men, ein slík hending, sum seinnapartin í gjár, tá neyðug frástøða ikki verður hildin - ja, tá er talan um brot á ferðslureglurnar, visti vaktleiðarin at siga í morgun.
Løgreglan leggur aftrat, at einki hendi fótgangaranum á Glyvrum, og bilarnir fingu bert smávegis skeinur.
