Í dag hitti amerikanski forsetin, Joe Biden, saudi arabiska krúnprinsin, Mohammed bin Salman, í Jeddah. Á vitjanini tók forsetin málið um drápið á journalistin, Jamal Khashoggi, upp við krúnprinsin.
Eftir fundin segði Joe Biden sambært Reuters, at hann var sólarklárur um drápið av journalistinum á fundinum við krúnprinsin, og hann duldi ikki fyri, at tað er hansara fatan, at drápið varð bílagt av krúnprinsinum.
- Eg gjørdi greitt, at málið er av alstórum týdningi fyri meg og USA, segði forsetin. Tænastufólk í Saudi Arabia, sum Reuters hevur skift orð við, vátta, at forsetin tók Khashoggi-málið upp við krúnprinsin á fundinum teirra millum í dag.
Joe Biden segði við krúnprinsin, at tað er hansara fatan, at krúnprinsurin persónliga hevði ábyrgdina av drápinum, sum fór fram í Istanbul í 2018, men Mohammed bin Salman sýtti fyri, at hann hevði persónliga ábyrgd av hendingini.
Tað var ein sonevnd deyðsdeild, sum lokkaði saudi arabiska stjórnaratfinnaran og tíðindamann hjá Washington Post inn á saudi arabisku sendistovuna í Istanbul, har tíðindamaðurin varð dripin og stykkjaður sundur.
##med2##
Amerikansk fregnartænasta kom til ta niðurstøðu, at boðini um drápið vórðu givin av krúnprinsinum, sum er veruligi leiðarin í Saudi Arabia.
Joe Biden hevur áður lovað, at tey, sum stóðu aftan fyri drápið av tíðindamanninum, skulu dragast til svars í málinum, og forsetin hevur áður sýtt fyri at hava samband við krúnprinsin.
Í samrøðunum millum forsetan og krúnprinsin varð eisini skift orð um ymisk viðurskifti av áhuga hjá báðum londunum, og her segði Joe Biden eftir samrøðurnar, at framgongd hevði verið millum partarnar.
