Nú verður minstulønin hjá fiskomonnum hækkað.
Samstundis verður minstiforvinningurin hjá útróðrarmonnum eisini hækkað.
Og harafturat verður illa umstrídda inntøkumarkið hjá útróðarmonnum fyri at sleppa upp i skipanina við minstaforvinningi, lækkað.
Jacob Vestergaard, landsstýrismaður í fiskivinnumálum, sigur, at hann hevur fingið eitt tilmæli frá stýrinum fyri trygdargunnin sum umsitur inntøkutrygdina um at bøta um skipanina.
Tað tilmælið fer hann at taka til eftirtektar.
- Tá ið eg fái eitt tilmæli frá stýrinum, ætli eg mær at fylgja tí, uttan meiri viðgerð, sigur hann.
Hann leggur afturat, at nú arbeiðir umsitingin í Fiskimálaráðnum við at broyta upphæddirnar í kunngerðunum og so verða tær lýstar.
Hann sigur, at tað eru ikki nógv bein í tí og tískil verða kunngerðirnar lýstar fyrsta dagin.
Bundu um heilan fingur
Alfred Petersen, sum er formaður í nevndini, sum umsitur inntøkutrygdina, sigur, at tað verður mett at kosta skipanini einar fimm milliónir krónur um árið, at hækka útgjaldið.
Men sum gongdin hevur verið, metir nevndin, at hetta hevur skipanin ráð til.
Hann sigur, at tá ið landsstýrið legði inntøkutrygdina undir partarnar í fiskivinnuni at umista, var stór óvissa um, hvussu gongdin fór at vera.
Grunnurin hevði bara eitt stovnsfæ upp á 50 milliónir og sjálvandi mátti útgjaldið leggjast soleiðis, at grunnurin ikki skuldi tømast.
Tískil gjørdi avgjgørt at binda um heilan fingur og sostatt av at vera sera varislig, tá ið útgjaldið úr skipanin skuldi ásetast.
Men nú heldur nevndin, at stundin er komin at hækka útgjaldið og tað hevur hon nú mælt landsstýrismanninum til.
Galdandi í eitt ár
Kortini hevur nevndin tað fyrivarni, at fyribils er hækkingin í gildi í eitt ár.
Hesa tíðina skal stýrið fyri Trygdargrunnin brúka til at lýsa og viðgera skipanina út í æsir og at leggja hana í fastari karmar.
Samstundis hevur stýrið gjørt av, at fyri 1. november í ár skal nevndin hava eina skipan, sum forðar kann fyri, at Trygdargrunnurin verður misbrúktur.
Tað merkir, at tær eftirlitsskipanir, sum longu eru, skulu skerpast munandi.
Alfred Petersen sigur, at tey hava hildið, at gamla skipanin kundi elva til misbrúk.
Men hann viðgongur, at hann hevur ongi prógv fyri hesum og hevur annars onki at hava tað í.
- Nú eru tað so partarnir á arbeiðsmarknaðinum, sum umsita skipanina og vit vilja brúka nógva orku upp á at tryggja, at avmarkaða fíggjarliga orkan í skipanini kemur í rættar hendur og ikki verður misbrúkt, sigur hann.
- 833krónur
- Um nakrar dagar fer minstulønin hjá fiskimonnum at hækka 133 krónur um dagin.
- Hetta er tað, sum stýrið fyri trygdargrunnin hevur mælt landsstýrismanninum í fiskivinnumálum at seta í gildið og hetta er tað, sum landsstýrismaðurin hevur boðað frá, at hann fer at seta í gildið fyrsta dagin.
- Í løtuni er minstulønin 700 krónur um dagin og statt fer hon at hækka 133 krónur, upp í 833 krónur um dagin.
- Annars verður minstiforvinningurin hjá útróðrarmonnunum eisini hækkaður.
- Minstiforvinningurin er í løtuni 12.000 krónur um mánaðin, men nú hækkar hann upp í 13.200 krónur um mánaðin.
- Hinvegin er tað eitt krav, at útróðrarmenn skulu avreiða fyri minst 400.000 krónur um árið fyri at sleppa undir inntøkutrygdina.
- Hetta hámarkið hevur verið fyri hvøssum atfinningum.
- Ført hevur verið fram, at hetta er so høgt, at nógvir útróðrarmenn detta niður ímillum og ikki kunnu fáa minstaforvinning, tí teir avreiða ikki fyri so nógv.
- Men nú lækkar markið niður í 300.000 krónur, ella niður í 150.000 krónur fyri hálvárið.
-
- Skeita til Noregs
-
- Stýrið fyri trygdargrunnin fer nú at brúka hetta næsta árið at kanna skipanina út í æsir fyri at leggja hana í eina fastari legu.
- Tá ið partarnar á arbeiðsmarknaðinum yvirtóku ábyrgdina av inntøkutrygdini, var tað nakað spildurnýtt og tey hava brúkt rúma tíð at finna ta røttu skipanina.
- Alfred Petersen, formaður í stýrinum fyri Trygdargrunnin, sigur, at eitt, sum tey fara at hyggja eftir, er, hvussu tey hava skipað seg í Noregi.
- Har er skipanin ógv einfaldari enn hon er í Føroyum.
- Í Noregi rindar reiðarin manningini fulla hýru, men er manglar í, fær reiðarin so endurgjald frá teirra trygdargrunni.
- Tað merkir, at Trygdargrunnurin ú Noregi hevur nógv færri viðskiftafólk enn trygdargrunnurin í Føroyum hevur, tí er er tað hvør einstakur fiskimaður, sum er viðskiftafólk hjá grunninum.
- - Tað hevði gjørt skipanina einfaldari, so tað er nakað, vit fara at kanna, sigur Alfred Petersen.
- Men um úrslitið verður, at føroyska skipanin verður umskipað, so at hon líkist teirri norsku, er alt ov tíðliga at siga, leggur hann afturat.
