Komandi fríggjadag, tann 20. mars, kl. 14.15 verður stórhending í tí føroysku akademikaraverðini og í øllum útisetaumhvørvinum, tá ið Bergfinnur Durhuus, sum er ættaður úr Vestmanna, verður alment útnevndur til professara í matematikk við Kjøpinhavnar Universitet.
Henda dagin er hátíðarhald á H. C. Ørsteds-instituttinum í auditorium nr. 4, og Bergfinnur skal halda sín fyrsta fyrilestur sum kosin universitets-professari um evnið ”Random geometry”.
Síðani Christian Matras gavst í 1964, hevur eingin annar føroyingur havt professaraheiti í Kjøpinhavn, og Christian var tann allarfyrsti føroyski professarin.
At vit nú fáa ein nýggjan føroyskan professara í Kjøpinhavn, er sjálvandi fyrst og fremst ein heiður fyri Bergfinn sjálvan; men vit útisetar eru eisini ernir av honum, og tað kunnu allir føroyingar vera.
Matras var professari í føroyskum og øðrum norrønum málum. Vit hava sjálvsagt nógva virðing fyri humaniora; men tað er avgjørt meira intellektuelt stimbrandi, at vit føroyingar eisini hava fingið eitt matematiskt riddaraslag og ein úrmæling á tí natúrvitskapliga økinum.
Tey natúrvísindaligu fakini hava tíanverri ikki veriδ serliga forkelaði henda síðsta mansaldurin, hvørki í Føroyum ella í Danmark, hóast tey flestu vita, at hesi fakini eru grundarlagið og fortreytin fyri øllum framburði. Bergfinnur hevur fleiri ferðir varliga gjørt vart við, at hann ikki heldur, at hansara fak, t.e. matematikk, kemi og fysikk verða nóg væl hagreidd í dagsins skúlum, hvørki í barnaskúlum ella á hægri lærustovnum.
Bergfinnur gjørdist studentur úr Havn 1970. Hann verður cand.scient frá Kjøpinhavnar Universiteti í 1976. Sum stipendiatur arbeiddi hann eitt skifti við fronsk universitet. Seinni arbeiddi hann á einum fysiskt/matematiskum stovni undir Niels Bohrs-instituttinum, inntil hann í 1984 varð settur sum adjunktur við sjálvt Kjøpinhavnar Universitet.
Fýra ár seinni, t.e. í 1988 gjørdist hann lektorur, og er endiliga í dag sum 58 ára gamal útnevndur til professara við tann lærustovn, har hann hevur fingið sína aðalútbúgving.
Vit eru nógvir útisetar, sum ætla okkum út á H. C. Ørsteds-stovnin at fagna Bergfinni Durhuus og ynskja honum tillukku við bæði starvi og titli (heiti).
Virgar T. Dalsgaard
