Tað gjørdist Gareth Bale, sum farna summar gjørdist dýrasti fótbóltsspælari nakrantíð, tá Real Madrid keypti hann frá Tottenham, ið gjørdist hetjan fyri Real Madrid. Hann skoraði avgerandi málið í Copa del Rey finaluni, tá bara fimm minuttir restaðu í dystinum.
Real Madrid var uttan Cristiano Ronaldo, meðan Sergi Ramos bleiv lappaður saman til dystin. Fyri Barcelona gjørdu skaðar, at Marc Bartra byrjaði inni í miðverjuni saman við Javier Mascherano.
Real Madrid kom á odda longu aftaná 11 minuttir. Dani Alves misti bóltin í uppspælinum. Tað endar við at Karim Benzema spælir Ángel Di María leysan og skorar.
Lionel Messi var ikki so nógv at síggja á bóltinum og tað gekk ikki heilt við smáspælinum. Heldur bleiv tað til nógv innlegg, sum verjan hjá Real Madrid ruddaði burtur.
Miðskeiðis í seinna hálvleiki kom so útjavnandi málið. Sigandi fyri manglandi gjøgnumbrotini hjá Barcelona, so kom málið eftir hornaspark. Xavi sendi bóltin innfyri til Marc Bartra, sum stútaði bóltin í málið.
Avgerandi løtan kom fimm minuttir fyri tíð, tá Gareth Bale vísti hví Real Madrid gjørdi hann til heimsins dýrasta fótbóltsspælara. Í kontrastøðu rann hann frá verjuni hjá Barcelona og tætt undir málinum prikaði hann bóltin millum beinini á málverjanum til 2-1.
Barcelona trýti seianstu løtuna og Neymar rakti stongina, men tað bleiv ikki til meir enn tað.
Copa del Rey finalan 2014:
Real Madrid – Barcelona 2-1 (1-0)
1-0 Ángel Di María, 11
1-1 Marc Bartra, 68
2-1 Gareth Bale, 85
