Við alibátinum, sum Kj Hydraulik flotaði herfyri, hevur fyritøkan á Kambsdali í løtuni tríggjar alibátar í ordrabókini, og samskifti er við alifyritøkur um møguliga aðrar bátar aftrat.
Báturin, sum sæst á myndini, verður bygdur til Bakkafrost á Glyvrum, og Bakkafrost skal í hesum umfari hava ein alibát aftrat, sum í løtuni stendur í gerð.
Viggo Johannesen, sølustjóri hjá KJ, sigur, at ein triði alibátur eisini er í ordrabókini, og hann verður væntandi latin eigarunum, tá komið er nakað inn í nýggja árið.
- Síðan hava vit ikki fleiri sáttmálar um alibátar beint í løtuni, men samskifti er við alifyritøkur sum umhugsa at byggja sær nýggjar bátar.
Hann vísir á, at alibáturin, sum herfyri varð flotaður og báturin, sum nú stendur í gerð, eru teir smærru bátarnir av sínum slag.
- Vit hava eisini nokso fitt av gera á Eiði, har nakrir mans alla tíðina arbeiða við at gera nýggjar aliringar, sigur sølustjórin, Viggo Johannesen.
