Tað endaði við 3-0 heimasigri, tá ið teir næstbestu hjá B36 tíðliga seinnapartin høvdu vitjan av grannunum í FC Hoyvík. Hetta var triðja ferðin á rað, at FC Hoyvík var á útivølli. Í løtuni verður ikki spælt á vøllinum í Hoyvík. Tað kemst av, at graslíkið verður skift.
Fyrsta málið varð skorað við brotssparki í fimta minutti, tveir minuttir undan steðginum varð 2-0, og síðsta málið varð skorað, tá ið tað restaðu 12 minuttir.
Miðvallarin Emil Weihe Joensen setti hol á við brotssparki, og hann átti uppleggið, tá ið Sámal Jákup Jacobsen økti um munin til 2-0. Hetta var triðja málið hjá Sámali Jákup í ár.
Emil Weihe Joensen staðfesti 3-0 sigurin, og aftur var tað við brotssparki. Hetta var fjórða málið hjá Emil í ár. Í vetur flutti hann aftur til barndómsfelagið, eftir at hann undanfarnu tvey árini hevur verið í Fuglafirði og so á Skála.
Eftir 3-1 heimasigur ímóti EB/Streymi í fyrsta umfari tapti B36 fýra ferðir á rað. So endaði tað 4-4 ímóti HB, og so er tað av álvara gloppið. Nú hevur B36 vunnið tríggjar ferðir á rað, og úrtøkan eftir fyrsta triðing av kappingini er 13 stig.
FC Hoyvík hevur 10 stig. Síðsti sigurin var 15. apríl, tá ið heimadysturin ímóti HB endaði 2-1.
Um eina viku eigur FC Hoyvík heimavøll ímóti Skála, og tá eigur B36 heimavøll ímóti B71.
