Eyðbjørn Thomsen, borgarstjóri í Sumbiar kommunu, sigur, at skattaprosentið í kommununi er lækkað tvær ferðir seinastu árini, tilsamans úr 21 niður í 19 prosent.
Aftrat hesum er barnaansingin eisini vorðin bíligari fyri barnafamiljurnar.
- Vit munnu hava bíligastu barnaansing í landinum, undantikið í Kvívíkar kommunu, sum hevur ókeyis barnaansing.
Borgarstjórin vísir á, at hægsta barnagjald í kommununi liggur um 1500 krónur, sum er fyri fyrsta barnið og síðan 750 krónur fyri tað næsta. Barnafrádrátturin er 6.500 krónur fyri hvørt barnið.
- Vegirnir í Sumbiar kommunu eru góðir, og í løtuni verður arbeitt við at gera pláss til minnisvarða og torg í Sumba.
Tað gongur eisini væl við skattainntøkunum í Sumbiar kommunu, sum higartil í ár eru øktar við sløkum seks prosentum í mun til somu tíð í fjør, tó at skattaprosentið er lækkað.
- Jú, vit eru nøgd við gongdina í kommununi, sigur Eyðbjørn Thomsen, tá In.fo vitjaði inni á hugnaligu kommunuskrivstovuni í Sumba.
