Í kvøld er fyrsti fjórðingurin av kappingini lagdur aftur um bak, og skal metast eftir stigatalvuni, so er dysturin í Vági ein av avgjørdu lykladystunum, sum koma at viga heilt tungt, tá tað í vár skal gerast av, hvør fer saman við Stjørnuni í finaluna.
VB hevur víst stóra styrki. Seinast við sannførandi útisigri móti Neistanum. Og á heimavølli eru tær vanliga sera tungar at syfta. Tjaldur hevur hinvegin prógvað sínar ætlanir um at vera við í oddinum, og sunnudagin fæst at vita, hvussu langt ávegis tær eru komnar í sínum ætlanum um veruliga at vinna seg heilt fram í oddin.
Í hinum báðum dystunum er talan um sera greiðar favorittar.
Neistin spælir á útivølli móti StÍF, og har eru tær bláu greiðir favorittar.
Og í Klaksvík verður talan um hálva sensatión, um Kyndil megnar at skapa bara nøkunlunda spenning um úrslitið móti Stjørnuni, sum altso hevur skúgvað alla mótstøðu til viks higartil.
