Mikukvøldið skolaðu lovorðini omanyvir Arsenal og Arsené Wenger. Á Emirates leikvøllinum í London megnaðir Arsenal at koppa Barcelona. Ensku miðlarnir skrivaðu síðu upp og síðu niður um avrikið. Í gjár spældi Arsenal so í FA Cup steypakappingini móti Leyton Orient á útivølli. Hóast Champions League hevur flestu av bestu liðnum í heiminum, so eu tað fáar kappingar, ið standa mát við FA Cup tá tað kemur til óvæntað úrslit. Leygardagin mundi Manchester United ikki vunnið á Crawley Town, sum spælir í fimtbestu deildini í Onglandi.
Rætt skal verða rætt og hvørki Arsenal ella Manchester United spældu við sterkastu uppstilling. Tað gjørdi Manchester City móti Notts County og vunnu greiðan 5-0 sigur. Tað er ikki óhugsandi, at bæði Arsenal og Manchetser United høvdu vunnu stórt um spælt var við sterkastu uppstilling.
Arsenal kom eftir ætlan á odda, men tveir minuttir fyri tíð javnaði Leyton Orient. Venjarin hjá teimum segði eftir dystin, at málið kom júst í røttu løtu, tí nú hevði Arsené Wenger ikki møguleikan at skifta eitt nú Cesc Fabregas og aðrar menn inn at avgerða dystin.
Fyri bæði Leyton Orient, sum nú skal spæla umdystin á Emirates leikvøllinum, og Crawley Town høvdu dystirnir stóra fíggjarligan týdning. Formaðurin í Carwley Town sigur, at felagið fer helst at vinna áleið tíggju millionur krónur upp á dystin móti Manchester United.
Um Arsenal vinnur umdystin móti Leyton Orient, so skulu teir møta Manchester United á Old Trafford í fjórðingsfinaluni. Um ikki, so fara Leyton Orient óiva fegnir ein túr á Old Trafford.
