- Vit kunnu fegnast um og vera takksom fyri, at hóast korona eisini merkti gerandisdagin hjá okkum øllum í 2021, so royndist farna ár kortini væl í okkara kommunu.
Tað siga tey í Nes kommunu á síni heimasíðu í dag.
Lagt verður aftrat, at fólkatalið í 2021 øktist við 53 fólkum, sum er ein vøkstur á 3,8 prosent. Hin 31. desember í 2021 búðu 1452 fólk í Nes kommunu.
Skatturin hjá Nes kommunu fyri desember 2021 gjørdist 5,175 miljónir krónur í mun til 4,793 miljónir í desember 2020.
Soleiðis var ein meirinntøka í skatti í desember í ár á 382.000 krónur - ella átta prosent í mun til sama mánaða í 2020.
Bert ein mánaður í 2021 royndist betur enn desember. Tað var februar, tá skattainntøkan var á 5,181 miljónir krónur.
Sambært fíggjarætlanini hjá Nes kommunu fyri 2021, skuldi skatturin í miðal vera 4,250 miljónir krónur um mánaðin, og sostatt var skatturin í desember 2021 925.000 krónur meira enn hetta - ella 21,8 prosent.
Álíknaði skatturin í Nes kommunu frá januar 2021 til desember 2021 var á 54,753 miljónir krónur, meðan metta álíkningin sambært fíggjarætlanini segði 51 mijónir. Soleiðis hevði kommunan eina meirinntøku í 2021 á 3,753 miljónir, sum svarar til 7,4 prosent.
- Taka vit reguleringina fyri undanfarin ár við í uppgerðina, so er hetta fyribils ein útreiðsla á 1,549 miljónir krónur. Sostatt verður meirinntøkan fyri 2021 á 2,204 miljónir krónur - ella 4,3 prosent - í mun til fíggjarætlanina fyri 2021, verður lagt aftrat.
##med2##
