Tíðliga sunnunáttina hendi eitt álvarsligt ferðsluóhapp á krossinum, Jóannes Patursonargøta/ Grønlandsvegur í Havn.
Sambært vaktleiðaranum á politistøðini í Havn koyrdu tveir dreingir á prutli út fyri ein bil, sum kom koyrandi eftir Jóanes Paturssonargøtu.
Dreingirnir á prutlinum høvdu treytaleysa víkiskyldu.
Um vikuskiftið varð sagt, at báðir dreingirnir høvdu fingið álvarsligan skaða.
Í morgun veit vaktleiðarin á politistøðini at siga, at annar drongurin hevur fingið stóran skaða, meðan hin drongurin er sloppin munandi lættari.
- Í løtuni vita vit ikki um viðgerðina, sum tað álvarsliga skaddi skal hava, og vit kunnu ikki upplýsa ítøkiliga um skaðarnar.
Spurdur, um tað er hugsandi, at rúsdrekka var uppi í ferðsluóhappinum, sigur vaktleiðarin, at tað kann hann einki siga um í løtuni.
