Eftir tveir ársfjórðingar við afturgongd vaks amerikanski búskapurin við 2,6 prosentum í triðja ársfjórðingi, vísa nýggj tøl frá amerikonsku stjórnini.
– Amerikanarar fingu gongd í vøksturin aftur í triðja ársfjórðingi. Eftir afturgongd bæði í fyrsta og øðrum ársfjórðingi, gongur aftur rætta vegin í amerikanska búskapinum, sigur Allan Sørensen, búskaparfrøðingurin í Dansk Industri við Ritzau.
– Tað er sjálvandi gleðiligt við framgongd aftur í USA, men framgongdin kann skjótt steðga aftur. Høga inflatiónin og nógvu rentuhækkingarnar taka luftina úr búskapinum.
Amerikanski búskapurin kann møta hóttafalli longu fyrst í 2023, sigur hann í viðmerking.
Inflatiónin er enn sera høg í USA. Tað hevur fingið amerikanska miðbankan til at hækka rentuna nógv fyri at steðga príshækkingunum.
Joe Biden, forseti í USa, sigur í viðmerking, at tølini fyri triðja ársfjórðing vísa, at búskapurin enn er sterkur.
Hann lovar samstundis at gera meira fyri at fáa prísirnar niður á fleiri økjum.
– Stjórn mín hevur samtykt lógir, sum far at lækka prísirnar á reseptheilivági og heilsutryggingum næsta ár. Vit skulu gera meira, sigur Joe Biden sambært Reuters.
/ritzau/
