- Higartil hava vit staðfest fýra álop á ukrainska høvuðsstaðin, Kyiv, í morgun. Eitt íbúðarhús í Sjevtsjenko-økinum er rakt, sigur hernaðarleiðslan í landinum.
Á borgarstjóraskrivstovuni í Kyiv verður sagt, at eitt fólk hevur latið lív, og trý hava fingið løstir í tí eina álopinum, og her vísa myndir ein smildraðan bygning.
Tíðindafólk hjá AFP siga, at tvær tær fyrstu spreingingarnar hoyrdust stutt eftir, at ávaringarlúðrarnir ljóðaðu í Kyiv tíðliga í morgun, men stutt eftir ljóðaðu lúðrarnir í víða um í Ukraina.
Borgarstjórin í Kyiv, Vitalij Klitsjko, hevur í morgun sagt, at eldur kom í eftir álopini, og fleiri bygningar í Sjevtsjenkivsky-økinum eru oyðilagdir. Jarnbreytarfelagið í Ukraina hevur eisini sagt frá álopi nærindis høvuðsstøðini í Kyiv.
Leiðarin fyri forsetaskrivstovuna í Kyiv, Andrij Yermak, sigur, at tað vóru iranskar kamikaze-dronur, sum vórðu brúktar í álopinum á høvuðsstaðin í morgun.
- Álopini vísa, at russar eru desperatir, leggur hann aftrat í sosialum miðlum.
Reuters visti eisini í morgun at siga, at elektrisitetið á nógv umrødda kjarnorkuverkinum, Zaporizjzja, er sligið frá eftir russisk álop.
- Russland hevur enn einaferð lopið á kritiska undirstøðukervið, sum er undir ukrainskum ræði, og avleiðingin er, at kjarnorkuverkið nú er loyst úr streymnetinum, sigur ukrainski tjóðarveitarin, Energoatom, á Telegram sambært The Guardian.
Sum skilst, eru hesi tíðindi ikki váttað av óheftum keldum.
##med2##
