Hvat skal til fyri at fáa fólkavøkstur í Føroyum?
Hetta er spurningurin, sum verður til viðgerar á almennari kvøldsetu í Østrøm í Havn á ársins næstseinasta degi mánakvøldið 30. desember.
Ráðstevnan verður hildin í sambandi við Jobmatch, ráðstevnuna, har virkið, fyritøkur, stovnar og aðrir arbeiðsgevarar og lesandi og arbeiðstakarar, fáa høvi at hittast.
Í hesum sambandi verður eisini kvøldseta klokkan 20 mánakvøldið um, hvussu fólkatalið í Føroyum kann fáast at veksa.
Kvøldsetan er skipað í tríggjar partar, har hvør partur endar við pallborðskjaki.
Fyrst fer Eydna Skaale, kandidatur í retorikki, at tosa um, hvussu kjakið á netmiðlunum ávirkar útisetar og teirra hug at flyta heim eftir loknan lesnað.
Síðani fer Árni Olsen, marknaðarleiðari á Bakkafrost, at greiða frá, um hvussu hann hevur skapað sítt egna starv og at enda fer Erika Hayfield, ráðgevari í Vinnumálaráðnum, at greiða frá hvørji tiltøk eru sett í verk fyri at steðga fólkafráflyting og at stimbra undir fólkavøkstur.
Við pallborði sita Marita Rasmussen, stjóri í Vinnuhúsinum, Jóan Petur Hentze, trivnaðarstjóri í Tórshavnar kommunu, Sølvi Jespersen, leiðari av talgildu marknaðarføringini hjá Atlantic Airways og Regin Berg, formaður í MFS.
Spurningar, sum verða umrødd, eru, hvør hevur ábyrgdina av at skapa ein positivan hugburð mótvegis Føroyum og hvat ítøkiligt kann gerast fyri at eggja ungum at skapa sítt egna starv ella at fara undir egið virkið? Somuleiðis fara tey at umrøða, hvat næsta stigið skal vera fyri at skapa fólkavøkstur og, hvørji tey týdningarmestu átøkini eru.
Ella eru vit á rættari kós yvirhøvur, spyrja tey eisini??
|
