Tíbetur hendi eingin fólkaskaði, tá stórar aldur frá einum koppaðum ísfjalli seint í gjárkvøldið raktu grønlendsku bygdina, Naajaat, sum liggur einar 40 kilometrar í ein landnyrðing úr Upernavík.
Sermitsiaq.ag veit frá vaktleiðaranum í Nuuk, Søren Bendtsen, at siga, at einar 6-7 jollur fóru í knús, tá aldurnar raktu. Eingir aðrir materiellir skaðar vóru í bygdini, og tað fegnast vaktleiðarin um.
Landstingslimurin, Jens Napaattooq, mælir á sínari Facebook-síðu til, at landstingið og kommunan seta í verk ein bráðfeingis hjálparpakka, sum kann hjálpa útróðrar-og veiðimonnum í bygdini, sum nú eru so hart raktir.
- Tað eru bert tvær jollur í bygdini, sum eru bjargaðar undan skaðahendingini, og hetta er ein vanlukkulig støða fyri bygdina. Tí vil eg heita á myndugleikarnr um at hjálpa.
Jens Napaattooq vísir eisini á, at í Naajaat búgva umleið 53 fólk, og við missinum av bátum og útgerð hava fleiri familjur eisini mist sítt lívsgrundarlag.
