Partrolararnir, Hamranes og Breiðanes, landaðu í Hvalba mánadagin. Skipini vóru full undir lúkurnar eftir at hava roynt í umleið eina viku.
- Hetta var ein góður túrur hjá skipunum, og veiðan vá umleið 240.000 pund tilsmans, siga tey hjá TG Seafood í Hvalba.
Lagt verður aftrat, at tað hevur verið hampiliga støðugt við fiskaarbeiði í Hvalba í vár.
- Aftrat skipunum, sum vanliga leggja veiðina upp í Hvalba, verður nakað eisini keypt á uppboðssølu, og soleiðis hevur eisini verið hesa vikuna.
Tá mest er at gera á TG Seafood, eru millum 65 og 70 fólk til arbeiðis á virkinum.
