Tá endaliga freistin at lata inn roknskapir hjá feløgum til Skráseting Føroya var úti á midnátt, vóru 56 feløg, sum ikki høvdu latið inn roknskapin. Tey verða nú send í Skiftirættin til avtøku.
Av Skrásting Føroya verður sagt, at tey sita og gera endaliga listan við feløgum, sum verður sendur Skiftirættinum í dag.
Tá In.fo seinnapartin í gjár spurdi, mangaðu 85 feløg at lata inn roknskapin, so fleiri hava hava verið í síðstu løtu. Um onkur hevur latið roknskapin inn eftir midnátt, verður felagið kortini sent skiftirættinum til avtøku.
Feløg, sum eru send í skiftirættin, kunnu takast uppaftur. Tað skal gerast innan tríggjar mánaðir. Men tað krevur, at roknskapurin verður latin inn, og at at gjald upp á 5.000 krónur verður goldið.
Í mun til í fjør, so eru tað átta feløg fleiri, sum hesaferð verða borin skiftirættinum hesaferð:
2013 48 feløg
2012 74 feløg
2011 87 feløg
2010 90 feløg
2009 120 feløg
2008 61 feløg
2007 39 feløg
2006 63 feløg
2005 55 feløg
2004 44 feløg
2003 38 feløg
2002 36 feløg
2001 28 feløg
2000 28 feløg
Av Skráseting Føroya siga tey, at feløg eisini verða send Skiftirættinum aðrar tíðir á árinum. Tað veldst um, hvussu roknskaparárið hjá feløgunum er. Tey, ið nú verða send, eru tey sum hava roknskaparárið sum álmanakkaárið. Tey meta, at talið á feløgum, sum verða borin skiftirættinum aðrar tíðir á árinum liggur um 20.
