Nógv fólk vóru til móttøkuna bæði familja, vinir og núverandi og fyrrverandi starvsfelagar.
Stjórin á Fiskirannsóknarstovuni, Hjalti í Jákupsstovu, helt eina talu, har hann í stuttum greiddi frá arbeiðnum hjá stovninum og segði m.a. at arbeiði hjá Fiskirannsóknarstovuni er í høvuðsheitum at fylgja við broytingunum í sjónum.
Hesi 40 árini hevur Arnold luttikið í at kalla øllum tættum innan fiskiroyndir og fiskifrøði og hevur verið nógv við fiskirannsóknarskipunum Jens Chr. Svabo og Magnus Heinason.
Hann hevur øll árini havt álitisuppgávuna at greina aldurin á fiski úr nytrum og roðslum. Í hesum arbeiðnum hevur hansara partur ongantíð ligið eftir.
Hjalti segði eisini at avgerandi í øllum arbeiði er arbeiðsgleði, og humor í dagligdegnum ger dagin ríkari, og at Arnold við sínum serliga havnar-speisemi mangan hevur gjørt dagin stuttligan.
Osmund Justinussen helt eisini eina talu, har hann mintist aftur á tíðina, tá hann og Arnold arbeiddu saman á Fiskirannsóknarstovuni í 60-unum. Hann segði, at hann mintist hesa tíðina sum eina sera góða og læruríka tíð.
Arnold trívist framvegis væl í hesum spennandi arbeiðnum við fiskiroyndum og fiskifrøði.
.
