Søkt hevur verið eftir nýggjum stjóra til Fiskaaling, og tá freistin at lata inn umsókn var úti 1. mars, hevði grannskoðari felagsins fingið 12 umsóknir um starvið.
Á nevndarfundi í felagnum 7. mars fekk nevndin handaðar umsóknirnar og fer nú at viðgera tær.
Øystein Patursson hevur seinastu tíðina røkt stjórastarvið í Fiskaaling, men hevur bara verið fyribilssettur í hetta starv.
Stjórin, sum skal setast, skal ganga á odda og saman við nevndini seta út í kortið kós felagsins.
Virksemið hjá Fiskaaling er fjøltáttað við rogna-og yngulframleiðslu til vinnuna, eins og stovnurin fremur vinnuvenda gransking og veitir vinnuni aðrar tíðarbundnar tænastur.
P/F Fiskaaling hevur eisini tætt samstarv við alifyritøkur, myndugleikar og granskingarstovnar í Føroyum og uttanlands.
