Høvuðsvinningurin í gekka-spælinum í kvøld var á 900.000 krónur.
Tað var Dánjal Skorá, sum ringdi úr Kaldbak, ið hevði fulla plátu og slapp at snara hjólinum.
- Nei, eg eri ikki úr Kaldbak, men eg eri eitt sindur allastaðni frá og havi konu úr Kaldbak, segði maðurin.
Og so slapp hann at royna eydnuna.
Í fyrsta drátti steðgaði hjólið á 30.000 krónum, men Dánjal Skorá helt fyri, at hann fór at royna einaferð aftrat.
Í øðrum drátti steðgaði hjólið á 20.000 krónum, sum er minsti vinningur í gekka-spælinum í løtuni.
- Vit koyra aftur, segði hann og fór í holt við triðju og seinastu royndina.
Í triðja drátti steðgaði hjólið á bláa leypinum við 104.000 krónum frá Miklagarði.
Tá tað gjørdist greitt, at hjólið var steðgað á bláa leypinum, hoyrdist Dánjal Skorá lágmæltur spyrja onkran aftanfyri:
- Hvat betýðir tað?
Tá gekkaverturin, Jan Gardar, hevði sagt honum, at nú kundi hann keypa fyri 104.000 krónur í Miklagarði, gjørdist hann ovurfegin.
- Ja, nú kanst tú keypa í Miklagarði fyri 2000 krónur um vikuna í eitt heilt ár, segði gekkaverturin.
Orðini hjá tí hepna vinnaranum vóru nú:
- Takk fyri, túsund takk fyri, segði Dánjal Skorá, sum í kvøld hevði valt at spæla Gekk í Kaldbak.
Næsta fríggjakvøld verður høvuðsvinningurin á 950.000 krónur, og ein nýggjur leypavinningur kemur í bláa leypin.
