SPECIAL OLYMPICS: Flogfarið, ið skuldi lenda kl 20:15 lendi ikki fyrr enn kl 21:50, men hóast seinkingina, virkaðu ítróttarfólkini frá Special Olympics 2007, sera glað. Nógv fólk var møtt upp til at fagna føroysku íðkarunum, venjarum teirra og leiðarum. Onkur hevði keypt fløgg og reyðar rósur, og vórðu fløggini deild út, so at øll kundu flagga fyri heimkomnu ítróttarfólkunum.
Ítróttargreinar
Á leikunum vóru, sum vera man, nógvar ymsar ítróttagreinir. Føroyar luttóku í trimum av teimum 23 høvuðsítróttargreinunum, og vóru hesar; boccia, frælsur ítróttur og svimjing.
Serliga innan svimjing stóðu Føroyar seg avbera væl, og har fingu vit eisini flestu heiðursmerkini, tó fingu vit eisini heiðursmerkir innan boccia og frælsan ítrótt. Samlaða talið av heiðursmerkjum var 11, og er hetta sera flott klárað.
Luttøka
Ikki minni enn 170 lond luttóku á leikunum í ár, og vóru tey umboðaði av heili 7500 íðkarum. Føroyar luttóku við 10 ítróttarfólkum; fýra innan frælsan ítrótt, fýra innan svimjing og tvey innan boccia. Harumframt vóru 6 venjarar og leiðarar við í ferðalagnum
Missiónin við Special Olympics
Missiónin við Special Olympics er at hava ítróttarvenjingar og atletiskar kappingar fyri børn og vaksin við menningartarni, alt árið ígjøgnum, á sama fjølbroytni, og Olympisku leikirnir hava, at geva teimum fleiri møguleikar at menna seg kropsliga, visa dirvi, uppliva gleði og taka lut í at deila gávur, evnir og vinarbond, við teirra familjum, øðrum íðkarum og samfelagnum.
Endamálið Special Olympics
Endamálið við Special Olympics er at hjálpa við at fáa øll við menningartarni inn í tað stóra samfelagið, undir umstøðum, har øll verða góðtikin, víst virðing og givin møguleikan at gerast produktivir borgarar.
Yngst og elst
Tann yngsti íðkarin á føroyska liðnum hesuferð er 15-ára gamla Sharada Unadóttir av Tvøroyri, hetta eru hennara fyrstu leikir í slíkum vavi, og er hon eisini sera glað fyri at hava verið við.
- Hetta hevur verið heilt fantastiskt at uppliva, fortelur Sharada. Hon leggur afturat, at tað vóru øðiliga nógv fólk, og tað var rættuliga spennandi. Sharada vann sær eitt fimta og eitt sætta pláss á hesum leikunum.
- Hetta vil eg fegin prøva aftur, eina aðru ferð, sigur Sharada og klemmar mammuna, sum hon hevur sakna so nógv.
Tann elsti íðkarin á føroyska liðnum var 38-ára gamla Unn Mortensen, eisini av Tvøroyri. Hon vann sær sítt fyrsta gullheiðursmerki á hesum leikunum, tá hon vann allar sínar dystir í boccia. Hon og Sharada fylgdust nógv og stuðlaðu hvørja aðra væl.
Responsur
Hetta er nakað við saktans kunnu vera stolt av, tí tey hava klárað seg sera væl, sigur ein av leiðarunum í ferðalagnum, Tóra Øre Hansen. Hon sigur eisini at tey eru nøkur megnar umboð fyri Føroyar, og at aðrar tjóðir leggja til merkis, at vit standa okkum so væl
Nakrir av okkara ítróttarfólkum sluppu enntá at heilsa uppá Formannin í Olympisku nevndini.
- Hetta er stórt sigur Tóra at enda.
Boks :
Special Olympics Summer Games 2007 í Kina
Navn: Aldur: Ítróttargrein:
Kristian Garðalíð 17 ár Frælsur ítróttur
Meiken Olsen 16 ár Frælsur ítróttur
Júst í Túni 21 ár Frælsur ítróttur
Sharada Unadóttir 15 ár Frælsur ítróttur
Ragnvaldur Jensen 17 ár Svimjing
Apolonia Justesen 22 ár Svimjing
Magnus Vatnhamar Olsen 21 ár Svimjing
Halla Poulsen 30 ár Svimjing
Elvin Weihe 27 ár Boccia
Unn Mortensen 38 ár Boccia
Venjari:
Meibritt Djurhuus 31 ár Boccia
Høvuðsvenjarar:
Sonni Djurhuus 33 ár Frælsur ítróttur
Dan Lamhauge 32 ár Boccia
Halla Weihe Reinert 21 ár Svimjing
Ferðaleiðarar:
Tóra Øre Hansen 31 ár
Mariann Øster 35 ár
