Seinastu play-off dystirnir til komandi EM endaspæl í Fraklandi hava í kvøld verið á skránni.
Í Danmark spældu Danmark og Svøríki, meðan Slovenia og Ukreina spældu í Slovenia.
Svøríki hevði undan dystinum eina 2-1 leiðslu við sær frá tí fyrra dystinum, og tí var danska liðið noytt at leypa á frá byrjan til dystin í kvøld. Tað var tó Svøríki, ið fekk ta betru byrjanina, tí longu aftaná 19 minuttir legði svenska stjørnan Zlatan Ibrahimovic, Svøríki á odda 1-0.
Tá 76 minuttir av dystinum vóru leiktir, fall avgerðin í dystinum. Við einum frálíkum frísparksmálið punkteraði Zlatan Ibrahimovic donsku vónina, tá hann skoraði til 2-0 til Svøríki. Danmark skuldi tá skora fýra ferðir, fyri at gera sær vón um at koma víðari.
Sigast skal, at Danmark megnaði at koma inn aftur í dystin, men tað var ov seint. Yussuf Poulsen minkaði fyrst til 2-1, og í tíðini sum dómarin hevði lagt afturat javnaði Jannick Vestergaard til 2-2, sum eisini varð endaliga úrslitið.
Í hinum dystinum vann Slovenia 1-0 móti Ukreina. 1-0 sigurin var tó ov lítið fyri Slovenia, tí Ukreina vann fyrra dystin 2-0.
Svøríki og Ukreina eru sostatt seinastu londini, ið hava leikt seg til EM endaspælið í Fraklandi komandi summar.
Danmark – Svøríki 2-2 (1-0)
Slovenia – Ukreina 1-0 (1-0)
