Nýggjársnátt kom stórur eldur í eina barr í kenda skíðstaðnum Crans-Montana í Sveis.
Talið av deyðum er mett til 40. Fleiri enn 100 hava fingið skaða.
Fleiri stórir eldar hava áður verið á náttklubbum og skeinkistøðum og hava kravt nógv mannalív.
Her er eitt yvirlit yvir nakrar av teimum deyðiligu eldunum:
* mars 2025: Eldur kom í ein náttklubba í býnum Kocani í Norðurmakedónia. Eldurin kyknaði av neyðblussum, sum vórðu tendrað undir eini hip-hop konsert. Eldur festi í loftið, og 63 fólk doyðu í eldinum.
* Apríl 2024: 29 fólk doyðu í einum eldi á náttklubbanum Club Masquerade í Gayrettepe-økinum í turkiska býnum Istanbul. Eldurin kyknaði seinnapartin, meðan náttklubbin varð umvældur. Eldurin stóðst eftir øllum at døma frá spreinging.
* Oktober 2023: Eldur kom í ein náttklubba í Murcia í landssynningspartinum av Spania, og breiddi seg til tveir grannaklubbar. 13 fólk doyðu. Orsøkin til eldsbrunan er ókend.
* Oktober 2015: Í Rumenia noyddist forsætisráðharrin at leggja frá sær, eftir at umleið 65 fólk doyðu av eldi á einum náttklubba í høvuðsstaðnum í landinum, Bukarest. Eldurin kyknaði, tá fýrverk undir rokktónleiki í náttklubbanum setti eld á ein part av bjálvingini á náttklubbanum, sum ikki var eldfast.
* Desember 2009: Ógvusligur eldur kom í, tá fýrverk varð tendrað í einum náttklubba í russiska býnum Perm. Fleiri hundrað fólk vóru inni á náttklubbanum, tá tað hendi. Umleið 156 fólk doyðu. Tað var bara ein hurð út, og nógv vóru fangað inni.
Kelda: Reuters, Ritzau og The Independent.
/Ritzau/
