Á aðalfundinum hjá Felagnum fyri Kirkjuráðslimir í dag, varð ein yvirlýsing tikin aftur og ein onnur vrakað
Nevndin hevði lagt fram uppskot um yvirlýsing, har ið kravt varð, at avvarðandi landsstýrismaður skal vera limur í Fólkakirkjuni. Fleiri vísti á, at tað er óheppið, um ein, sum ikki hoyrir til Fólkakirkjuna, skal góðkenna ritualini.
Uppskotið møtti tó harða mótstøðu, og summi sóu uppskotið sum eitt persónligt álop á sitandi landsstýrismann, Jógvan á Lakjuni.
Eisini varð víst á, at landsstýrismaðurin í kirkjumálum einans hevur hægsta umsitingarliga vald, meðan bispur hevur evsta vald á kirkjunnar innaru virðum.
Eftir lívligt kjak, tók formaðurin í felagnum, Tummas Lauritssen, uppskotið aftur.
Seinni varð eitt annað uppskot lagt fram um at senda yvirlýsing til landsstýrið við áheitan um at útseta yvirtøkuna, til lógararbeiðið er liðugt.
Hetta uppskotið kom til atkvøðugreiðslu og varð felt við 14 fyri og 41 ímóti.
Nevndin ætlar at kalla inn til eykaaðalfund fyri at fremja eina lógarbroyting í viðtøkum felagsins.
